GERNIKAKO HOSPITALE MILITARREAN HILDAKOEN OROIMENEZ HILERRIAN PLAKA BAT JARTZEAN ABESTUTAKOAK
2008KO APIRILAREN 12AN.
Jon Enbeita
Ez al zen nahiko bonbaren sua,
ametrailadore dantza...
Ez al zen nahiko hainbat gizaki
eta herrien triskantza,
hospitale bat bihurtuteko
heriotzaren baratza!
Zapaltzeaz gain, errematean,
zeinen agoni garratza.
Horrela ito nahi izan zuten
amets baten esperantza.
Badakit, plaka batek ez dauka
mirarirako ahalmenik.
Badakit, berriz ez da biztuko
kartzela hartan hil zenik.
Nahiz ta eskatu behar lukenak
ez eskatu barkamenik,
balioko du ez dadin ahaztu
martiri haien izenik,
ez dadin galdu gerra hartako
zarrazkien oroimenik.
